「天貓出海」呢啲計劃名真係 Horse Cloud (編按：即「馬雲」) 先諗到，幾有霸氣！需知道，海對大陸人黎講，係好大件事。因為除左沿岸城市，海對大部分大陸人黎講，其實唔知係乜東東黎，頂多都係知乜野係 (長) 「江」，或者乜野係 (黃)「河」。所以今次「出海」，簡直可以媲美鄭和下西洋。

好，入返正題。今次「天貓出海」，主要係經之前收購嘅 Lazada，進攻東南亞。好多人唔知天貓係乜，或者唔知同淘寶有乜分別，總之就係阿里巴巴 (US: BABA) 啲 Friend。其實天貓同淘寶嘅主要分別，就係天貓上面賣嘅都係「品牌貨」，全部有名有姓。但係淘寶就係任何人都可以開店，而大家都知質素無乜保證。

至於點解會有天貓出現，全因為京東 (US:JD)。京東以 B2C (Business to Consumer) 起家，京東嘅創辦人就係劉強東，即係早排 Horse Cloud 同王衛鬧翻，好高調出黎話信得過王衛人品嗰位。本身淘寶係屬於 C2C，假貨多唔使講，其實品牌無乜位企，因為品牌野一定貴啲。點解你會淘寶？就係貪平，咁自然唔會要求有品牌，或者有質素。

點知大陸人收入增長神速，開始買野有要求，變相京東愈做愈大，2014 年騰訊 (700.HK) 仲要入埋股。Horse Cloud 都心知不妙，嗱嗱臨抄左個 Business Model，開返間一模一樣，就係今日嘅天貓。

至於今次踩入東南亞，一定唔小心途經香港。話說天貓已經喺香港試行左一排，仲出哂口術話成績唔錯。

最頭痕係邊個？當然係王維基啦。

下次繼續講。

#天貓 #Tmall

唔知講乜可以睇呢度：

「天貓出海」搶攻東南亞印度

鳴謝及轉載自野原新的助理

(編輯作出少量修改；文題由編輯所擬。)