被匿名分析唱好 瑞聲前景一定好？
其實 Anonymous Analytics 幫被 short sell 嘅公司反擊已經唔係第一次，正確黎講，同類事件發生已經係第二次。
早喺 2015 年 3 月，AA 已經幫神冠 (829.HK) 打過一次反擊戰。
話說神冠喺 2014 年尾被另一間 short seller Emerson Analytics 話佢造假，神冠都係停牌然後話指控失實。呢個時候，AA 呢個程咬金走出黎話神冠呢間公司係真嘅，仲好有投資價值咁話。
我當時都睇過份報告，其實寫得唔錯，但問題係神冠本身市值太細 (當時都係講緊 50 幾億港幣，而家得嗰 17 億港幣)，流通量唔高。雖然公司好大機會係真嘅，但係公司前景又係另一回事。
而事實係，雖然得到 AA 拔刀相助，神冠自 2015 年 4 月頭發過威之後，就一沉不起。
想講嘅係，全條街嘅財經報章雜誌，見到 AA 為瑞聲 (2018.HK) 護航都好似發現新大陸咁，實情係已經唔係第一次。
神冠嗰次無乜點被報導，係因為市值細，啲人對公司認識唔多。今次涉及嘅係一隻大藍籌，自然關注度會高好多啦。
但講到尾，其實 AA 咁做都係為左保住 short seller 飯碗。一陣大家見 short selling report 見到習以為常，到時唔驚咪大穫！？而好明顯，AA 同相關人仕當然喺出報告之前，已經 OTC 反手買入。既然講得出 OTC 價係 HK$75，即係現價 HK$95 已經執左 27%。 Good move！
係真係假，對 AA 同 Gotham City 黎講，已經唔再重要。
瑞聲同神冠走勢會唔會一樣，大家拭目以待。
唔知講乜可以睇呢度：
鳴謝及轉載自野原新的助理
(編輯作出少量修改；文題由編輯所擬。)
Further Exploration