馬雲硬上弓 王衛睇得通
物流業的 Bluffing Game
上次講到，Horse Cloud (編按：即「馬雲」) 成日打橫黎行已經有哂前科，之前黎香港上市已經想夾硬黎。
唔知講乜可以睇返呢度：馬雲夾硬黎有前科 為利益同順豐開火
今次咁高調同順豐駁火，一定無死錯人。點解咁講？你諗下，雖然話順豐有淘寶先有今日，但其實淘寶都係有順豐先有今日。同呢個拍住上嘅 partner 都開得火，涉及嘅利益可想而知。
而呢舊咁巴閉嘅利益就係⋯⋯登登燈凳 —— 菜鳥物流。
題外話先，「菜鳥物流」絕對 Horse Cloud 旗下公司改得最 humble 嘅一個名，講到明你知係物流初哥，咁就可以黎一招扮豬食老虎。
咁菜鳥物流係乜？簡單啲講，就係學人地阿 Uber 咁，不廢一兵一卒，利用數據就可以調配物流資源。阿里巴巴 (BABA:US) 一路之所謂值錢，就係因為係「互聯網公司」，輕資產呀嘛。但做物流，真係實實在在要將件貨由 A 點運到 B 點，無得偷雞。即係話，一係阿 Horse Cloud 走去養自己嘅運輸隊，如果唔係就要有能力調配物流資源。
咁 Uber 就話有出面啲司機啫，滴滴都話有成堆的士俾佢調，咁菜鳥又有乜運輸資源可以調呢？無錯！講黎講去，其實咪又係得順豐。
成件事變得簡單哂，如果你係順豐，你會唔會畀 Horse Cloud 調？ 啲好勝嘅人就會話「梗係唔制啦！」； 保守啲嘅就會諗「唔俾佢調，呢個最大嘅生意夥伴咪分分鐘冇左！」成年事就係一個咁嘅 poker game，鬥 bluff 嘅啫。
Horse Cloud 率先發功，好明顯因為佢點都急過另一邊。但王衛哥話哂打滾左咁多年，由帶住幾條友做到帶住十幾萬條友，你真係當佢傻的嗎？Horse Cloud 你話你揸四條咩？阿王衛哥未必揸緊同花順，不過佢嘅四條大過你嗰四條，夠贏。
但係最攪笑係，個莊竟然叫停鋪牌，所以唔知邊個大邊個細，但睇形勢 Horse Cloud 點都弱啲。
雖然成件事發展到呢一刻，有阿爺 (編按：「國家郵政局」) 出手調停叫做 settle 左，但係可以見到有幾樣野：
- 第一，為左令菜鳥物流行得通， Horse Cloud 可以去到幾盡？呢一個佢曾經好大聲話「最敬重的人」都夠膽一腳想伸開佢。
- 第二，Horse Cloud 敵人眾多 (可以調返轉講，其實係無朋友)，京東 (JD:US) 嘅劉強東唔使講，嗱嗱聲出黎抽水，話信得過王衛哥為人，即係唔信你阿 Horse Cloud 啦。馬化騰都不甘示弱，騰訊 (700:HK) 表明支持順豐。
- 第三，如果菜鳥物流得左，全世界都會好大穫，因為所有數據都會被 Horse Cloud 食哂，到時所有 online offline 零售商加埋所有運輸公司都唔會有還擊之力。所以，要襯佢未攪得起就唔好畀佢攪起。
- 第四，王衛實在係一個聰明人，兩手準備，用定騰訊雲，唔使畀馬雲，呀，唔係，係阿里雲揸住條頸。不槐為 Horse Cloud 「最敬重的人」!
好，講住咁多先。 (已經好多⋯⋯)
講 Horse Cloud 真係一匹布咁長，遲啲再講，食晏先！
#如果物流真係可以咁玩Amazon已經做左
#不過喺中國有時啲野都冇話冇可能
#菜鳥物流 #Cainiao
唔知講緊乜可以睇呢度：
鳴謝及轉載自野原新的助理
(編輯作出少量修改；文題由編輯所擬。)