即將踏入4月，財政預算案喺立法會嘅審議亦去到下一個階段，繼3月頭各議辦瘋狂就預算案各項政府開支入Q之後，政府就各議員問題嘅書面答覆亦終於陸續公開，即刻同大家睇睇目前為止最引人注目嘅題目！

通常各議員都會就自己跟進開嘅政策範疇提問，而東江水嘅議題近年就有越嚟越多議員跟進，當中憑住揭發鉛水事件成為「水質專家」嘅黃碧雲就關注本港各類用水成本，政府回覆就話，原來從水塘收集雨水成本價係每立方米4.3元、用作沖廁嘅再造水每立方米成本要5至6元，而東江水成本則最巴閉，貴過廁所水逾50%，每立方米生產成本達到9.5元，扣除購水價5.8元，即每平方米東江水就用咗3.7元作過濾同加工！以2016年供水量6.29億立方米去計，單係過濾同加工東江水已經使咗23億元公帑！

至於建制派議員又問咗咩問題？當然係關心祖國啦！民建聯李慧琼就問政制及內地事務局會唔會喺中國大陸舉辦香港特區成立二十周年嘅慶祝活動。你以為條問題好荒謬？更荒謬嘅係政府嘅答覆，原來本年度預算案已經預留超過4000萬元用作喺大陸舉辦「慶回歸」活動，呢啲活動包括喺大陸主要城市舉辦展覽、文藝活動、慶祝晚宴／酒會、青年／學生活動、電影節等等。

呢啲活動具體究竟有咩大陸居民會參與？4000萬具體分布係如何？活動會由咩人統籌？有咩協辦單位？暫時全部不得而知。呢4000萬，睇怕都係潑出去嘅水，仲好快會變成送俾大陸嘅油水！

最後想講亦係最吊詭嘅一題，就係張華峰問到有關《基本法》嘅推廣開支時，政府回應原來本年度用於 hard sell《基本法》嘅公帑係1600萬元，當中更講明會喺學校做宣傳活動。但原來英文版答案入面竟然有彩蛋，突然披露原來過去3年政府每年只係使咗160萬元推廣《基本法》，今年卻突然急升至1600萬元，足足增加十倍！如此重要嘅數字，居然只在英文版披露，莫非政府以為咁就會無人發現？