立法會就今年預算案「入Q」的期限已過，總計政府今年收到7321條問題，同舊年嘅7360條相若。政府年年收咁多問題當然唔順氣，但咪以為問題多多又同拉布有關，事實上無論問題多定少，政府都必須在3月31日財委會開始審議預算案前，書面回答其中至少3000條問題，即大約有一個月時間處理。

政府今個月預計都要開OT答問題，財經及庫務局局長陳家強都俾哂嬲嬲，前年就講過話咁OT法，答一條問題成本至少要$4800喎......即使約莫300幾罐午餐肉咁話，總數加起嚟都夠俾陳茂波裝修官邸果二百萬。

但其實政府並唔係每條問題都肯答，因為政府同財委會主席都有權裁定問題係咪符合規程，例如舊年政府就向議員講明有關「基本工程儲備基金」嘅問題係「不合乎規程」，直頭唔會答。筆者曾經問過立法會秘書處，過往財委會主席可根據《財委會議事程序》第49條中「審核開支預算的目的，是確保所要求的撥款，不會超過執行核准政策所需的款項」為由，裁定問題是否合規程，由於基本工程儲備基金的撥款早已批出，故並不屬於預算案中的開支預算。

不過有關「基本工程儲備基金」的書面問題其實過往十多年均有議員提出，因為工程每年的進度及用錢額度均不同，預算案有助議員了解工程進度，一般而言政府都會願意回答。至於為何政府突然於去年開始拒絕作答，則不得而知了...