上回提到，每年預算案公布後，都是立法會議員及助理們工作量最繁重的時間，除了因為要閱覽足足兩大個Box File的開支預算之外，還要應付另一艱鉅工作 -- 「入Q」！

每個議員辦事處都有約一星期的時間，就整份預算案，包括各部門開支預算的細節提出書面問題，例如點解某項item今年使多咗錢？某項政策使咗一大筆錢後成效如何？這星期內，各個議辦便各自要準備數以百計的問題，呈交予政府回應。近年由於議助們太過勤力，政府部門都話頂唔順，因而每年預算案都會設定「入Q」限額，例如今年便只限每議辦首49條問題可優先作答，不過數數手指，set quota 後政府都總共要回答超過3000條問題！

至於以往議員們會問乜呢？試過有議員問究竟特首辦有無統計過特首 Facebook Page 收到的嬲嬲數量，可惜特首辦竟然回答︰無！其實傳媒一早已經幫手統計好哂，仲咁問法，叫新聞統籌專員真係情可以堪...

政府的書面回覆其實亦有好多平時不會輕易透露的數據，例如香港水塘因為滿溢而去倒落鹹水海的數字、近年大陸留學生佔資助研究課程的百分比、教育局就支援普教中的開支等等...很多資料對政策討論其實非常有意義！

睇到呢度，或者你會問︰超過3000條問題，點睇得哂？放心，每年三月尾至四月頭，政府逐步將書面回覆放上立法會網頁，到時各大傳媒的記者就會代大家刨哂所有回覆，大家只要到時留意傳媒報導就可以，當然我亦會在這裡分享我的觀察！