《洛奇外傳：王者之後》

估唔到喺 Rocky Balboa 嘅「超完美告別」十年之後，喺老掉牙嘅師徒外傳中，仍然會搵到教麻甩佬眼淚直流嘅佬味、情味。片中刻意重現若干經典名場面，幸而箇中「傳承」意味遠高於空洞無物嘅「致敬」；片中一場長鏡頭，令人睇得目定口呆！

《樹大招風》

以梟雄末路帶出濃烈政治隱喻，動機經已十分藝高人膽大；由三位新導演領軍嘅幕後團隊，各個崗位亦見交出超水準表現，令成品猶如行雲流水，簡潔有力，主題曲令電影聊添一份淒美（無奈）。

《早死早投胎之地獄搖滾篇》

《愛之剝脫》後最滿足嘅觀影體驗，近年日本電影最具玩味之作。由地獄搖滾作引子，遊走六道輪迴，講親情講真愛，乖張癲狂得令人愛不釋手，世上可能只有日本仔做得到。

《十萬水急》

即使絕望，不能失望 - 縱然眼前一片暗無天日，請緊記幽默係身處炎涼世態之下，對抗荒謬嘅最大殺傷力武器。香港人，共勉之！

《初戀無限 JAM》

濃厚 80 Retro 味固然引人注目，但醉翁之意在於兩小無猜對所愛嘅人、事、物，流露出毫無修飾嘅熱情同酷愛。片末一幕出走，場面設計簡單，但精準道出青春為何物。

《救你命 3000》

兩位落難巴打「相濡以沬」嘅騎呢故事 - 信我，天下間冇一套電影比起呢套戲，更能詮譯呢四個字嘅意思。講到尾，究竟成套戲發生過嘅嘢係真定假？唔重要，反正片中嘅另類手足之情，已經足夠你發自內心地又笑又喊。

《比海還深》

是枝裕和《奇蹟》嘅極致進化版。借父子重聚娓娓道出生而為人嘅無力感，窮盡一切力量，亦無法成為理想「大人」嘅模樣。相比起「徒弟」西川美和，《比海還深》比《漫長的藉口》言簡意賅好幾條街，大師功力猶在。

《怒》

信任、質疑同背叛，久未如此撼動心靈。多條支線各具神彩，性質迥異但緊扣主題，結局揪心但不忘開一扇窗，絲絲人性曙光暖透人心，餘韻不斷，絕對對得住全片極豪華嘅演員陣容。陳家富年度 NO.1。

《鋼鋸嶺》

Mel Gibson 十年磨一劍，成品雖不如代表作 Braveheart 滿腔熱血，但不論言情以至戰爭場面，依舊一貫鑊氣十足；擺明車馬力 Sell 大美國主義，但效果毫不違和，身體力行証明薑還是老的辣。

《神奇虎爸》

又一探討「理想自學國度」電影融入喪親元素，調子頗灰暗沈重，對現實社會嘅殘酷荒謬作出無聲吶喊，榮耀歸於「阿拉崗」及一眾年輕主演極出色表現。片中一場歌舞祭典，巧妙改編經典搖滾樂曲，效果除卻感動更有一分 Born to be Wild 嘅叛逆感覺。

撰文：陳家富@吊頸都要睇吓戲