毫無疑問，《鋼鋸嶺》同「反戰」兩個字扯唔上啲咩關係，而片中赤裸裸嘅大美國主義 - 包括對日軍嘅 stereotype，可能亦同普世價值相去甚遠；然而，你又不得不佩服本片嘅藝高人膽大，夠膽死以一個「非常軍醫」作主線切入二戰，前半嘅軍政、親情同愛情以及後半嘅震撼戰爭場面各自拍出懾人戲味，十分賞心悅目。

有外國影評謂《鋼》片係 Mel Gibson 自《驚世未了緣》後嘅最佳作品，對此小弟留有商榷餘地，但單論感官震撼層面，Gibson 的確比起《阿波卡獵逃》更為落重火藥，承襲佢一貫嘅血腥暴力作風之餘，槍戰嘅實感同壓迫之強更係近年罕見！呢位由《驚》片開始已經令小弟深深迷戀嘅導演，經已不單止係寶刀未老，直頭係老馬有火，相隔十年一出手即見真章！

故事以真實事蹟改編，Gibson 當然亦有把握機會借電影力 Sell 福音，但佢就係有能本事將宗教嘅 Passion 隱含喺整套電影之中，化為生而為人擁抱生命嘅熾熱，效果對各路觀眾都唔會失禮，絕無任何肉麻說教；而小弟亦喺散場後同友人講笑咁講，當今國際知名商業片導演之中，敢拍露骨意識形態（包括前文提及嘅宗教、大美國）而仍然拍出火氣佳作嘅導演，除卻 Gibson 就應該只有 Eastwood。

爭啲漏咗講～～數勻成套戲多位主角，Vince Vaughn 做嘅魔鬼教官角色最為突出，教向來淨係睇佢做笑片嘅陳家富驚喜萬分！最煞食係嚴肅之中略帶兩分睿智幽默，令角色更為立體出彩，希望佢唔好再拍 B 級笑片作賤自己，唔該。

順帶一提，此片音效相當爆得，子彈實感凝造極佳，不同槍械嘅質感尤其明顯，相信又會成為一隻試機必備嘅藍光影碟。

鳴謝友人邀請觀影。