乍看《洋腸派對》Trailer,仲以為係單純嘅「食物逃生記」- 原來太純情嗰個係我。用「喪心病狂」四個字形容全片,仍覺保守得過分,豈能想像超級市場貨品之間儼如小小社區,你有你諸多 Taboo,我有我 Horny 上腦 - 結局處理堪稱蔚為奇觀,將利慾無限放大,天地萬物無外乎告子曰一句「食色性也」,叫人咋舌之外但又不得不拍案叫絕。
滿以為「衰仔隊草類型電影」嚟嚟去去三幅被,豈料將「戰場」搬到動畫電影,始發現 Seth Rogen、James Franco 同 Jonah Hill 忽上腦得無可夠藥!片尾伏線驚艷得教看倌意猶未盡,好好加以發揮,成為成人版《反斗奇兵》史詩級系列絕對指日可待。
鳴謝友人邀請觀影 - 仲有,發行商入場前贈送嘅「洋腸」乙條(真係食得嗰種呀)同埋汽水。「肚滿腸肥」之下觀賞如此扭曲破格癲喪式喜劇,別有一番樂趣!
P.S. 翻譯字幕嘅楊小姐,容許我對你給予「直豎拇指」嘅最高評價。此片鬼佬 local 笑話之多,若非經你發揮小宇宙妙筆生花,怕且難以交出「主能夠,我信祂能夠」嘅抵死 expression。