Surrealhk 創作人Tommy Fung 近日首辦個人作品展My Surreal Life In Hong Kong，作品背景以香港景色為主，配以獨特嘅修圖技巧，展現一幅幅超現實，迷幻似真嘅作品。喺Tommy眼中，香港係充滿色彩嘅城市，佢更認為

香港人都有責任宣傳呢個地方有幾靚！

Flying Taxi Temple Street (2017)

Tommy自細就同父母移民委內瑞拉，四年前先回流香港，對於啱啱返到香港嘅佢而言，香港人俾佢嘅感覺係好唔開心，因此，佢選擇用攝影來了解香港呢個地方。不過四年過去，Tommy嘅諗法依然冇變，但就明白多咗點解香港人會咁唔開心，「我覺得（香港人）都係唔開心，但係我依家就明白多啲點解背後有呢個唔開心，多啲了解點解香港人咁忙碌，呢樣嘢令到我做作品嗰陣時，某啲議題會同其他人嘅諗法都相似，好有共鳴，而我做一幅圖，人哋都覺得係佢嘅諗法，我就覺得我同呢個社會都connect， 因為我最怕就係自己好disconnect ，如果我真係住喺一個超現實世界，係同呢個社會斷關係嘅，我就覺得啲人唔會鍾意我嘅作品囉。」

Infinity Choi Hung Estate (2018)

Tommy 嘅作品往往加入咗好多社會議題，佢認為自己有機會在呢個地方發聲，就一定要發聲。「其實係委內瑞拉，因為我始終都係外國人，我喺嗰邊係唔可以發聲音，我係冇權選總統，選省長嗰啲嘅嘢，返到嚟香港，始終係呢個地方出世，呢個地方係屬於我嘅家，我就覺得以前咁多年來冇得發聲，我返到嚟，我有機會發聲，我點解唔發聲呢？我係用我自己嘅表達方式，同埋我自己嘅個人意見嚟發聲。例如房屋問題，呢個問題好嚴重，但係好似都有啲人唔理，咁我就發聲囉，其實所有社會問題我有我自己睇法，我諗到有啲嘢想講，我就會搵我嘅方法去講。」

雖然香港過去一年發生了非常黑暗嘅日子，但Tommy依然認為要正面面對。「每樣嘢其實都有佢嘅好同唔好，譬如呢個日出咁樣，都係今年影嘅，大家唔可以唔記得香港有幾靚，大家要放大啲靚嘅嘢嚟睇，而唔好全部野都放大啲唔好，當然所有嘢都係有平衡，但係始終個人睇得多啲靚嘅嘢會開心多啲。」

Hong Kong 30-6-2020 (2020)

Tommy 希望透過作品，帶給觀眾快樂，未來更希望將呢份快樂帶岀國際。「希望可以跳出國際，希望帶我啲作品去其他地方擺，同埋國際化少少，雖然我都係會keep 住以香港做所有嘢嘅話題，但可能帶多啲國際化嘅嘢混合埋一齊，等到其他地方嘅人都有共鳴。」佢表示自己最想去智利沙漠及冰島影相，將大自然融洽香港，製作岀震撼嘅作品。

講到跳岀國際，Tommy 更表示香港人有責任宣傳香港，「其實我覺得香港個個人都有責任比其他人，其他外國人睇，香港其實係有幾靚，個個人都應該幫香港宣傳呢個地方有幾好幾靚。」

有興趣嘅朋友記得留意展覽嘅日期啦！

日期：2020年10月31日至11月8日

時間：12pm-7pm

地點：13a New Street Art Gallery ,13a New Street, Tai Ping Shan, Sheung Wan

IG： @surrealhk