Surrealhk創作人Tommy Fung 近日首辦個人作品展My Surreal Life In Hong Kong，其獨特嘅改圖風格深受香港人歡迎，但原來色彩嘅背後都藏住一段段不為人知嘅辛酸史！

Tommy自細就同父母移民委內瑞拉，四年前先回流香港。由於喺委內瑞拉嘅時候，Tommy已經係一個自由工作者，因此返港後，佢都選擇重操舊業，不過就轉變咗拍攝嘅風格與題材。對於啱啱返到香港嘅佢而言，香港人俾佢嘅感覺係好唔開心，因此，佢選擇用攝影來了解香港呢個地方。

四年嘅自由工作者生涯，Tommy 了解到嘅唔單止係香港人嘅故事，佢亦都感受到香港人嘅壓力來源。對佢而言，香港嘅物價指數的確非常高，佢更話：「租又貴，搭車又貴，乜嘢都貴，都真係幾大壓力」，不過為咗興趣，Tommy就只好慳住洗，「慳啲囉，可以好慳㗎，有得行嘅地方就行啦，唔好搭車，我覺得呢啲嘢係睇你自己點樣平衡，即係有啲人就鍾意行街睇戲，我自己就鍾意影相。」

面對金錢嘅壓力，Tommy都好慶幸屋企人從未反對佢嘅工作，「（屋企人）都支持嘅，雖然都擔心嘅，因為成日都話，其實你做呢啲嘢搵唔搵到食㗎呢？我心諗搵唔到食㗎，睇吓點囉，遲啲先算啦呢啲嘢。同埋我覺得搵錢呢樣野，又唔可以放係第一位，最緊要係你做每件事都會令到你個人開心，如果你搵到錢，但係又唔開心，咁有乜嘢意思呢？所有嘢我都覺得應該有個平衡，你收入係可以維持到自己（生活），咁就算啦。」

為咗平衡生活同興趣，除咗慳，Tommy都會選擇接Jobs，不過初來報道嘅佢同樣面對新入職自由工作者嘅煩惱，佢認為接到jobs係新人面對嘅最大困難，「因為啲人唔熟悉你就真係難接job 嘅，有陣時一係冇job ，有job 呢，就好多一齊嚟，咁你係handle 唔到嘅，呢個就係自由工作者嘅問題啦，你想做，但係你又做唔到，好似好慘咁，因為我自己就唔鍾意好馬虎地交一啲作品，如果我知道我自己handle 唔到，就唔會接住先囉。」

講到作品展，Tommy 立即浮現喜悅嘅表情，睇得岀每份作品都係佢心血之作，其中一幅 Triple Decker Bus ，佢更表示自己用咗三十個鐘去進行改圖，「啲駁口位，同埋佢背後嗰啲霓虹燈係逐個逐個要影出嚟 Key 上去。其實呢一幅相除咗呢一個 version 之外呢，我係不停地做其他第二或者第三（個version）， 等到最後對比之下 ，係邊幅最靚囉，咁呢度加加埋埋整咗30個鐘頭到，淨係p 圖，所以係好長。」當被問到點解可以咁堅持一份咁辛苦嘅工作呢？佢就表示自己的興趣及觀眾嘅支持推動自己繼續創作，「本身我自己鍾意先啦，呢個就係出發點啦。大家嘅反應其實都係另一個（原因）會令到我繼續做呢件事，雖然有啲圖，啲人睇完就好快忘記 ，但有陣時有啲就深刻好多，啲人就覺得好有共鳴，好表達到佢嘅心聲，呢樣野係令到我都覺得幾好，因為好似除咗我自己講緊我自己心聲之外，好似都幫緊其他人發聲咁。」

Triple Decker Bus (2019)

Tommy 深深明白到自由工作者嘅辛酸，亦都感受到呢一行嘅困難，面對其他人對呢一行嘅不解與閒言閒語，佢就表示每個人都有佢嘅堅持，只需衡量當中值唔值得，而堅持又可以keep 到幾耐。最後，佢更勉勵一班自己友，「堅持，你想做嘅嘢冇話一定得，但係如果你唔堅持就一定唔得，因為所有野都要努力先會得到，而冇人會知你而樣嘢係可以揾錢或者生活。」

有興趣嘅朋友記得留意展覽嘅日期啦！

日期：2020年10月31日至11月8日

時間：12pm-7pm

地點：13a New Street Art Gallery ,13a New Street, Tai Ping Shan, Sheung Wan

IG： @surrealhk