改編自一青妙兩本熱賣著作嘅電影《阿媽，今晚食乜餸》，引子甚為引人入勝：一青妙、一青窈姊妹倆（木南晴夏、藤本泉 飾）喺闊別多年嘅東京老家整理物資，拾得早早離逝嘅母親和枝（河合美智子 飾）剩低嘅一本台灣菜食譜，以此引申出「回味」（憶述母女生活）、「尋味」（台南尋根）兩段動人之旅。

和枝跟隨顏惠民（吳朋奉 飾）嫁到台南，幾經遷居、喪夫等等事件，東京小屋中空餘母女三人相依為命。一如日本倫理映畫耍家套路，電影集中和枝笑看人生順逆，流露出堅忍、倔強同時不失佻皮傻氣嘅濃烈母愛，功勞歸於河合美智子自然而內儉嘅演繹。針對本片故事選材，日、台歷史傷痕固然無可避免觸及，惟處理上亦貫徹和枝個性 - 背負悲慟過去，就更要活好現在同將來，為身邊人而積極、努力生活。

喺 2017 年嘅日本映畫嚟講，本片絕非特別亮眼嘅一部作品，整體節奏、風格更見前後不一 - 或者唔少人會不其然咁同李安嘅《飲食男女》作出比較，但既然珠玉在前，何不選擇喺和枝嘅廚房門外，細看呢位廚師未盡完美，卻又唔失禮人前嘅獨門功架呢？

優先場鳴謝：

Movie Express電影速遞

MY WAY FILM CO.,LTD.