《當他們認真編織時》畀人嘅感覺,活脫脫好比主角凜子(生田斗真 飾)一樣:慢熱、靜謐,甚至有種難以靠近嘅 First Impression;但當你願意打開心扉,靜聽凜子同佢身邊嘅人,將生活零碎嘅片段、難關有如 Pillow Talk 一樣溫柔細訴,你自會不由自主被箇中嘅幽默感,以及對生命義無反顧嘅熱愛所感染 - 而凜子對身邊人嘅溫婉,更係令人不自覺心頭一暖。


本片引人入勝嘅關鍵,無疑係凜子同小女孩小友(柿原琳佳 飾)之間淡然而細膩嘅「母女情誼」,自然率真,可愛而動人。撇除整體超班嘅演技以外,令筆者更覺難能可貴嘅,係當咁多年嚟睇過無數窮得只剩下肉慾(而以藝術自居)嘅 LGBT 電影後,《當》片既能取其中為主流忌諱嘅素材,同時加諸電影後亦無嘩眾取寵嘅感覺 - 舉例如片中凜子所編織嘅「東西」,乍聽可能足以令道德高地居民水土不服,但處理上拿捏得相當舉重若輕,清新可喜之餘亦甚具意境。


若果要雞蛋裡挑骨頭,就要數片中非常「忠奸分明」嘅人設。手法雖然略為俗套,但諗深一層「奸角」人設嘅原意,講穿咗唔係正正想大家理性批判咩?


嗚謝:

名威影業有限公司

Movie Express 電影速遞