任天堂Switch今年3月推出，一個月後旋即推出旗下著名遊戲之一 – 《Mario Kart 8 Deluxe》；Switch 機細細融合以往家用及手提機於一身、方便攜帶，令我回想起以前NDS 年代。

NDS 年代玩 Mario Kart 最好係多人對打，一班人可以坐係自修室（唔好學）、公園、McDonald's 圍著打。曾經跟不少朋友組隊一齊約去McDonald's 打機，輸家要請所有人食一個餐；大家雖然係對手，但有品的會講聲：「小心藍龜！」，因為「藍龜」近乎必殺技，要避「藍龜」一般都需要時間準備，但總有人留守第二、第三，等第一名中龜就有機上位。基本上為贏第一，幾卑鄙、幾賤格的方法都見過。認識一位朋友，經常被人當水魚，永遠被幾位「車手」聯合攻擊，令佢經常成為輸家，我問佢你有無察覺，他好爽快答：「我知啦，由佢地啦，最緊要大家開心，Mario kart 都唔會玩幾耐......」wow，豁達！未幾，Mario Kart 因NDS 熱潮減退，街上已經無再發現有人玩。

但任天怎會放過Mario Kart 隻金蛋；2008年推出Mario Kart Wii，結合Wii的體感操控，完全將鬥車帶入屋，不過家用遊戲機已侷限了大家的互動，雖然有網上平台供玩家使用，但始終要約齊人到某個地方打，想有以前「麥記」的互動已經無可能......

今年推出部Switch ，標明集手提與家用遊戲機於一身，隨時可以駁電視打又可以出街打，加上推出一個月後就即刻出《Mario Kart 8 Deluxe》(今次銷售策略好聰明啊 !!!) 真係吸引到唔少人搶購，至少宜家日本當地可以話一機難求，但香港反而更容易入手，不過一般要連兩隻Games 一齊買；又有乜所謂，只要包一隻Mario Kart 就OK！

而今次《Mario Kart 8 Deluxe》基本上可以算Wii U《Mario Kart 8》加強版，可以形容換湯不換藥，電腦依然用盡任何道具、方法陷害你，幾個車手夾擊，終之令你無日安寧，最麻煩係班機械人，連藍龜都避到（其中有個小喇吧道具好好用），你直情想同電腦講：「你玩__晒啦！」。不過，極其量佢地只係一班載著面具的機械人角色，最後都係用家主導，唔似得可以同其他人有互動的感覺，贏唔到只能怪自己技不如人，再當你玩200cc Time Trial Ghost，就等同一個凡人見到龍珠裏面大界王，尾燈同影都唔好諗住見到XX......不過有一點可以好肯定，玩過 Time Trial 等同入完一次精神時光屋，功力大增。

反而今次加入有兩個選項令我覺得減少樂趣，分別 Smart Steering & Auto-Accelerate。第一個Smart Steering ，可以令玩家安全保持在跑道上（原本電腦設定為ON），基本上架車飛幾高、轉彎幾快都唔會衝出跑道，當所有車手最密集就會變成困獸鬥，想推其他車手、機械人出跑道好困難; 另外，轉彎擦火更易，不過紫火依然最難擦。第二Auto-Accelerate，好簡單、即「自動波」，對新手入門好有用，但對大部分玩過Mario Kart 都明，適當時候需要減速或慢速。假如見有對手兩個選項都用，有時會覺得低一級，但人有思想有互動已經同電腦好大分別，因為人與人之間的互動永遠係電腦無可能代替。

而最近又開始見到有部分人到餐廳、茶樓圍起鬥車，我諗係時候練習避藍龜、儲多少少金裝備，同其他人打都唔失禮啦，之後好快就出Monster Hunter⋯⋯

#全金裝備好難打 #點解機械人要識行捷徑 #ghostarecrazy